Նախքան ծրագրային ապահովման շահագործմանն անցնելը ծանոթացեք սույն պայմանագրի դրույթների հետ։ Սույն պայմանագիրը կարգավորում է իրավահարաբերությունները “Բարկոդ ԷյԷմ” ՍՊԸ-ի (այսուհետ Կատարող) և այն իրավաբանական կամ ֆիզիկական անձանց (այսուհետ Օգտատեր) միջև, որոնց վրա տարածվում է ստորև ներկայացված պայմանները։

Կատարողը պարտավորվում է Օգտատիրոջը մատուցել սույն Պայմանագրով նշված Ծառայությունները, իսկ Օգտատերը պարտավորվում է ընդունել Ծառայությունների արդյունքը և վճարել դրա համար։ Պայմանագրով Կատարողը պարտավորվում է ներդնել Haysell համակարգը (այսուհետ՝ Համակարգ) և սպասարկել (այսուհետ՝ Ծառայություն), իսկ Օգտատերը պարտավորվում է ընդունել Ծառայությունը և վճարել դրա համար Պայմանագրով սահմանված ժամկետում և կարգով: Կատարողի կողմից Ծառայությունը կարող է մատուցվել Պատվիրատուի գործունեության վայրում և (կամ) Կատարողի գրասենյակում և (կամ) Կատարողի գրասենյակից հեռահար սպասարկմամբ:

Օգտատերը`

• Պարտավոր է սույն պայմանագրով նախատեսված դեպքերում, ծավալով և կարգով աջակցել Կատարողին` աշխատանքները կատարելիս
• Պարտավոր է սույն պայմանագրով նախատեսված ժամկետում և կարգով Կատարողի մասնակցությամբ ընդունել կատարված աշխատանքը իսկ Պայմանագրից աշխատանքի արդյունքը վատթարացնող շեղումներ կամ աշխատանքում այլ թերություններ հայտնաբերելու դեպքերում այդ մասին անհապաղ հայտնել Կատարողին։

Կատարողը՝

• Պարտավոր է մինչ սույն Պայմանագրի կնքումը Օգտատիրոջը անհրաժեշտ և հավաստի տեղեկատվություն տրամադրել առաջարկվող աշխատանքի, դրա տեսակների և առանձնահատկությունների, գնի և վճարման կարգի մասին, ինչպես նաև Օգտատիրոջ ցանկությամբ նրան հաղորդել աշխատանքին վերաբերող այլ տեղեկություններ.
• Պատասխանատվություն չի կրում Օգտատիրոջ կողմից որևէ երրորդ կազմակերպության լիցենզիոն պայմանների խախտման համար:

Համակարգից օգտվելու համար Օգտատերը պետք է անցնի գրանցման գործընթաց՝ գրանցման ձևանմուշով` տրամադրելով Համակարգին ամբողջական և հավաստի տեղեկատվություն: Օգտատերը պետք է նաև ամբողջությամբ ընդունի Գաղտնիության Քաղաքականությունը, սույն Դրույթները և Պայմանները: Օգտատերը պատասխանատվություն է կրում իր Մուտքի լիազորությունները գաղտնիությունը չպահպանելու համար: Պրոֆիլի անձնական տվյալների` որևէ երրորդ անձի փոխանցման պատասխանատվությունը կրում է Օգտատերը։Եթե Օգտատերը կասկածներ ունի, որ իր հաշիվն այլևս անվտանգ չէ, քանի որ այն գողացվել է, կորել, բացահայտվել և այլն, ապա անմիջապես պետք է սույն փաստաթղթի ներքևում տրամադրված էլեկտրոնային փոստի հասցեի միջոցով այդ մասին տեղեկացնի Կատարողին:

Համակարգը տրամադրվում է ամսավճարով։ Ներդրված համակարգի սպասարկման համար ամսական գինը/ամսավճարը հաշվարկվում է ընտրված Փաթեթին համապատասխան: Վճարում կատարելու անհրաժեշտության մասին Օգտատերը տեղեկացվում է Կատարողի համար ընդունելի եղանակով:Օգտատերը պարտավոր է սույն պայմանագրով սահմանված ամսավճարը Կատարողին վճարել յուրաքանչյուր ամիս։

Կատարողն իրավունք ունի փոփոխելու այս Պայմանները և Համակարգի համար կիրառվող ցանկացած այլ Քաղաքականություն: Այդ փոփոխությունները վավեր են դառնում տվյալ կայքում տեղադրման պահից: Օգտատիրոջ կողմից Համակարգի շահագործումը շարունակելու դեպքում կհամարվի, որ ընդունել եք այդ փոփոխությունները:

Սույն Պայմանագրով սահմանված վճարը չվճարելու դեպքում Կատարողը կասեցնում է ծառայությունը։ Օգտատերը Ծառայության կասեցված օրերի համար պարտավոր է Կատարողին վճարում կատարել: Օգտատերը կարող է ցանկացած ժամանակ հրաժարվել Ծառայությունից՝ տեղեկացնելով Կատարողին, սակայն պարտավոր է վճարել արդեն իսկ մատուցած Ծառայության համար: Պայմանագրի վաղաժամկետ դադարեցումը Կողմերին չի ազատում միմյանց նկատմամբ այդ պահի դրությամբ ունեցած պարտավորությունների կատարումից:

Սույն Պայմանագրով պարտավորություններն ամբողջությամբ կամ մասնակիորեն չկատարելու համար Կողմերն ազատվում են պատասխանատվությունից, եթե դա եղել է անհաղթահարելի ուժի ազդեցության հետևանքով, որը ծագել է սույն Պայմանագիրը կնքելուց հետո, և որը Կողմերը չէին կարող կանխատեսել կամ կանխարգելել։ Այդպիսի իրավիճակներ են երկրաշարժը, ջրհեղեղը, պատերազմը, ռազմական և արտակարգ դրությունը, քաղաքական հուզումները, գործադուլները, հաղորդակցության միջոցների աշխատանքի դադարեցումը, պետական մարմինների ակտերը և այլն, (որոնք անհնարին են դարձնում սույն պայմանագրով պարտավորությունների կատարումը)։ Եթե արտակարգ ուժի ազդեցությունը շարունակվում է երեք ամսից ավել, ապա Կողմերից յուրաքանչյուրն իրավունք ունի լուծել պայմանագիրը` այդ մասին նախապես տեղեկացնելով մյուս Կողմին։

Սույն կայքի կամ վերջինիս միջոցով մատուցվող ցանկացած Ծառայության օգտագործմանն առնչվող կամ դրանից բխող տարաձայնությունները և վեճերը լուծվում են բանակցությունների միջոցով, իսկ Կողմերի համաձայնությամբ դրանք լուծելու անհնարինության դեպքում ենթակա են քննության դատական ատյաններում` Հայաստանի Հանրապետության գործող օրենսդրության համաձայն:

Եթե Օգտատերը ցանկանում է ժամանակավոր կասեցնել մատուցվող Ծառայություններն ավելի քան երկամսյա ժամկետով, ապա համապատասխան դիմումը ներկայացնելուց հետո պարտավոր է առկա պարտքն ամբողջությամբ մարել։

Պայմանագրի լուծման դեպքում Ձեր կողմից վճարված կանխավճարը ենթակա չէ վերադարձման

Գրանցվելով Համակարգում, որը ենթադրում է անձնական տվյալների գրանցում և ներկայացում, Օգտատերը սույն Գաղտնիության Քաղաքականության համաձայն տալիս Է համաձայնությունը Անձնական տվյալների մշակման համար: Համակարգի ներդրման և դրա նպատակների իրականացման նպատակով Օգտատերը Կատարողին կարող է տրամադրել Գաղտնի Տեղեկատվություն, իսկ Կատարողը պարտավորվում է սույն Պայմանագրի գործողության ամբողջ ընթացքում և դրա դադարեցումից հետո, որևէ երրորդ Անձի համար չբացահայտել կամ նրանց այլ կերպ չտրամադրել Գաղտնի Տեղեկատվությունը: Սույն Պայմանագրում Գաղտնի Տեղեկատվություն է համարվում Օգտատիրոջը և նրա գործունեությանը վերաբերող ցանկացած տեխնիկական, ֆինանսական, ապահովագրական, կազմակերպչական, առևտրային, բանկային և (Պատվիրատուին և նրա գործունեությանը վերաբերող) այլ տեղեկատվությունը, որն անհայտ է այլ անձանց և երրորդ անձանց անհայտ լինելու ուժով ունի իրական կամ հնարավոր առևտրային արժեք, չկա օրինական հիմքերով այն ազատորեն ստանալու հնարավորություն, և Կատարողը միջոցներ է ձեռնարկում դրա Գաղտնիության պահպանման համար: Կատարողը գիտակցում և համաձայնում է, որ Պայմանագրի գործողության ընթացքում իրեն հայտնի դարձած Գաղտնի Տեղեկատվության հրապարակումը, բացահայտումը կամ այլ կերպ երրորդ անձանց տրամադրումը կարող է վնաս հասցնել Օգտատիրոջը, որի համար Կատարողը կկրի պատասխանատվություն ՀՀ օրենսդրությամբ սահմանված կարգով: Կատարողը պարտավորվում է չընդօրինակել և/կամ չպատճենահանել և/կամ չօգտագործել իրեն տրամադրված Գաղտնի Տեղեկատվությունը՝ բացառությամբ սույն Պայմանագրով նախատեսված նպատակների համար և օրենսդրությամբ սահմանված կարգով:

«Բարկոդ Էյ Էմ» ՍՊԸ-ն պաշտպանում է իր Օգտատիրոջ անձնական տվյալները, որոնք գրանցված են Համակարգում, չլիազորված մուտքերից, օգտագործումից և/կամ բացահայտումից: Օգտատիրոջ անձնական տվյալները և բոլոր գումարային գործարքները պաշտպանված են Secure Socket Layer (SSL) տեխնոլոգիայով՝ 128-բիտանոց, բարձր պաշտպանվածություն ունեցող կոդավորմամբ, որը 100%-ով ապահովում է ինֆորմացիայի անվտանգ հոսքը Օգտատիրոջից դեպի սերվեր և հակառակը` բացառելով որեւէ երրորդ կողմի միջամտությունը: